DUGI RAT

Malo ko, ni zna di je…
malo ko, nije izgubija ure i ure u njoj…
more se slobodno reč da ni bilo tak'ega mista na ovon dilu zemjine balote…
svit koji je živija na ijade kilometri daleko, zna je za nju, i patija ča i ko'nji nima jedna takova…
lipo, malo, smišno misto…su malin, okruglin, svitlečin podon za balat, su malon ka funtanon i vodoskokom, su malin, odvojenim separejima,
su malin svičnjacima po zidovima u njima, di su jedva, jedvice, svitlile crveno-naranča žaruje, pa je svaka cura bila lipotica,
jerbo bi se pod otin svitlon, svi čiri, dlake oli mače po faci izgubili, svaka je bila ka bonbon,
mi smo stalno iskali oči po tleju koliko su nan ispadale, parili smo kučci su isplaženin jezičinama,
daščali i namištali se odisprid sve dok nas ne bi istirale ča, da ča smo se napenalili tot odisprid, da smetamo, da se od nas ne vidi ništa …

NA KRAJU DANA, NA KRAJU GRADA

Gušti su se plačali...

Piše: Željko Petrić
Izvor:skroz.blog.hr 
Foto: Restoran Arkada

malo ko, ni zna di je…
malo ko, nije izgubija ure i ure u njoj…
more se slobodno reč da ni bilo tak'ega mista na ovon dilu zemjine balote…
svit koji je živija na ijade kilometri daleko, zna je za nju, i patija ča i ko'nji nima jedna takova…
lipo, malo, smišno misto…su malin, okruglin, svitlečin podon za balat, su malon ka funtanon i vodoskokom, su malin, odvojenim separejima,
su malin svičnjacima po zidovima u njima, di su jedva, jedvice, svitlile crveno-naranča žaruje, pa je svaka cura bila lipotica,
jerbo bi se pod otin svitlon, svi čiri, dlake oli mače po faci izgubili, svaka je bila ka bonbon,
mi smo stalno iskali oči po tleju koliko su nan ispadale, parili smo kučci su isplaženin jezičinama,
daščali i namištali se odisprid sve dok nas ne bi istirale ča, da ča smo se napenalili tot odisprid, da smetamo, da se od nas ne vidi ništa…

Detalj iz Arkade danas ...

ka'bi započela mužika za balat, ujedanput bi nastala eksplonzija o' svitli, koja su trkala simo-tamo, u miljardu koluri,
vrtili se ukrug, svitlila ka munje, deboto bi čovik čeka da počnedu gromi cipat…
tako je znalo svitlit…
petak, subotu i nediju bi se tot nabilo i natiskalo toliko svita, da su se vrata zatvarala, i u nika doba, nisi višje moga ulist unutra…
ko je uša, uša je…
tot su znale bit najpoznatije tuče, koje bi se danima poslin spominjale, i svaki put bi bile sve večje i žešče u pripričavanjima,
jerbo smo mi meštri za pripričat, čipo onako kako je bilo…
koškanje bi započelo unutra ali bi i' brzo itnilo vanka, di su se mogli nastavit lemat koliko očedu…
tako je puno tuča finilo, a da ovi iznutra, nisu ni znali ča se dogaja…

ruku na srce, unutra nikad nisu puno letile katrige, jerbo su red uvik tiščala dva lapana, uvik u nikin tisnin majama,
da bi in se boje vidili mišiči, nisi zna koji je veči o' koga, parili su ormaruni…
naši tučari su uvik bili u dobru šnjima…jerbo su znali, jedni i drugi platit buletu, i koliko ko more u njima peškat…
puno puti, su se organizirale i tonbole, i ja san jedanput i dobija, ka' je tonbula bila mukte putovanje su Ajdukon u Španiju,
naravski, ako projde iduče kolo…

Ma je'l to ćer od one krasotice? Mogla bi bit, mogla bi...

izgubija je, i on i ja…
nikad nisan jema sriče, u igrama na sriču…

unutra se svirala naboja muzika na svitu, najfriškija, a u ariji se je čutija jedan poseban štimung, ka' da nismo ovod, di smo,
nego odotamo izdaleka…iz nikog drugog svita…

oto misto ni bilo u gradu, nego doli, blizu sadašnjega otela Lav, i odilo se je omiškin autobuson,
ko nije jema auto,
ili ko se nije utira jedan drugome…
mi u klapi smo uvik jemali po jedno auto, za doč do tamo…a vračali bi se, kako ko…
puno, puno puti i na noge …napravila bi se kolona, i onda kroz zajebanciju, nogu prid nogu, dolibili bismo se do kuće…
uz put, bili su sve privatni vrtli su praskama, grozjen, šljivan, onin malin jabukama,
pa smo mi priskakivali žice i ramade, i odili u lupeštinu…puno puti bi zapeli u mraku, i iskidali gače na žici,
ali sve je oto miritalo naspram onemu ka'bi smo se natukli, i zeleni, i zrili' prasak ka prajci, pa bi nas znala uvatit i litavica do kuće,
a onda bi odili stisnuti' guica…ko bi nas gleda reka bi: vidi oni' pedera…

zimi bi guštali, onako propuvani o' bure i zmrznuti, upast okolo tri, četr bota u pekaru, i kupit vručega kruva,
kojega bi kusali okidanog na bokune, dok se iz njega parilo…
to je onda, za nas bija najboji krafen na svitu…nima veze šta bi nas poslin zabolija stumik…

Detalj iz Arkade danas ...

narafski da san ovo govorija o prvome, pravome disko klubu u Splitu…

o ARKADI…

poslin se je otvorija SEMAFOR i BADY…
bija san na otvaranju i jednega, i drugega, i ostavija puste pineze unutra…

ali…
ARKADA je bila jedna i jedina…
barenko za me…

e…

 

Piše: Željko Petrić
Izvor:skroz.blog.hr